Լիբանանի նախագահ Ժոզեֆ Աունը հայտարարել է, որ շիական «Հըզբոլլահ» կազմակերպությունը հրահրում է կառավարության տապալումը՝ խաթարելով Իսրայելի հետ համաձայնագրի կատարումը։ Նա դատապարտել է շարժման՝ փողոցային բողոքի ցույցերի կոչերը։
Նախագահի խոսքով՝ օրինական իշխանությունների դեմ նման գործողություններն անընդունելի են և կարմիր գծի անցում։ Նա նշել է, որ «Հըզբոլլահը» մերժում է Իսրայելի հետ շրջանակային համաձայնագիրը իրանա-ամերիկյան բանակցություններից տարանջատելու լիբանանյան պետության որոշումը։
Աունը հայտարարել է, որ կազմակերպությունը գործում է Իրանի ազդեցության ներքո և խեղաթյուրում է Վաշինգտոնում ստորագրված համաձայնագրի բովանդակությունը։
Նախագահն ընդգծել է, որ փաստաթուղթը չի օրինականացնում Իսրայելի ներկայությունը, այլ ուղղված է լիբանանյան բանակի վերահսկողության ուժեղացմանը երկրի ամբողջ տարածքում և իսրայելական զորքերի դուրսբերումից հետո հարավում կայունության ապահովմանը։
Իսրայելի հետ շրջանակային համաձայնագիրը ստորագրվել է հունիսի 26-ին՝ ԱՄՆ-ում բանակցություններից հետո։ Այն նախատեսում է լիբանանյան բանակի ինքնիշխանության ամրապնդում, ոչ կառավարական կազմավորումների զինաթափում և իսրայելական ուժերի դուրսբերում Հարավային Լիբանանից։
