Hetq — Հակակոռուպցիոն դատարանը՝ դատավոր Լևոն Պետրոսյանի նախագահությամբ, հուլիսի 24-ին որոշեց վերացնել «Ուժեղ Հայաստան» դաշինքից ընտրված պատգամավոր Դավիթ Ղազինյանի կալանքը, քանի որ նրա փաստաբանները դատարանում պնդեցին, որ հուլիսի 21-ին Ղազինյանն արդեն ստացել է պատգամավորի մանդատ, ուստի օժտված է անձեռնմխելիությամբ, և նրան այդ կարգավիճակից կարող է զրկել միայն Ազգային ժողովը։ Դատախազն առարկում էր՝ առաջարկելով կալանքը փոխարինել 1 միլիարդ դրամ գրավով, սակայն դատարանը մերժեց այդ միջնորդությունը։ Դավիթ Ղազինյանն ազատ արձակվեց անմիջապես դատարանի դահլիճից։
Հիշեցնենք, որ հունիսի 17-ին Կենտրոնական ընտրական հանձնաժողովը բավարարել էր դատախազության միջնորդությունը՝ Ղազինյանի նկատմամբ քրեական վարույթ հարուցելու և նրան կալանավորելու համար, ինչից հետո դատարանը նրան երկու ամսով կալանքի էր ենթարկել։ Առաջադրված մեղադրանքը կապված է Հակակոռուպցիոն կոմիտեի հրապարակած ձայնագրության հետ, որտեղ խոսվում է 1,4 միլիոն դրամի ենթադրյալ ընտրակաշառքի մասին։
