«Հայաստանի խաղողագործների միության» նախագահ Արտակ Սարգսյանը 168.am-ի հետ զրույցում մտահոգություն է հայտնել Ռուսաստանի կողմից Հայաստանից արտահանումների սահմանափակումների և դրանց՝ շուկայի վրա ունեցած ազդեցության վերաբերյալ։ Նա նշել է, որ Ռուսաստանի շուկայի փակվելը կաթվածահար կանի ոչ միայն խաղողագործության ոլորտը, այլև ամբողջ տնտեսությունը։
Սարգսյանի խոսքով՝ խաղողագործությունն առանց վերամշակող ձեռնարկությունների գոյատևել չի կարող։ Եթե հայկական կոնյակի կամ գինու շուկան փակվի, խաղողագործը սոված կմնա, քանի որ մթերողը նոր խաղող չի գնի։ Նա շեշտում է, որ հայ գյուղացին «օրվա հացով ապրող մարդ է», և մեկ տարվա իրացման խնդիրը ամեն ինչ գլխիվայր կշրջի։
Ինչ վերաբերում է ԵՄ շուկաներ արտահանմանը, Սարգսյանը կարծում է, որ ԵՄ-ն ունի փակ տնտեսություն և իր անելիքը նախապես է պլանավորում։ Այսօր որևէ մեկը պատրաստ չէ անակնկալ առևտրաշրջանառություն իրականացնել՝ հատկապես, երբ տվյալ երկրին սահմանակից չէ։
Նա հավելել է, որ ԵՄ-ն հայկական ապրանքների կարիքը չունի, ավելին՝ ունի չափանիշներ, որոնց Հայաստանի տնտեսությունը դեռ չի համապատասխանում։ Սարգսյանը ԵՄ-ի հայտարարությունները համարում է «ականջ շոյող և պոպուլիստական»՝ ուղղված Ռուսաստանին տարածաշրջանից և Հայաստանից ռուսական ռազմաբազան հանելուն։
Այս պահին ակնկալվում է առատ խաղողի բերք։ Եթե մթերողները բերքի մի մասը միայն մթերեն, իսկ մյուս մասը չարտահանվի, ապա այն կփչանա, և խաղողագործը ստիպված կլինի այն թափել։ Սարգսյանի խոսքով՝ Հայաստանի տնտեսությունը դեռ անկախ չէ, և Ռուսաստանի շուկայի փակումը «կատաստրոֆա է» երկրի համար։
Նա հույս է հայտնում, որ Հայաստանի դիվանագիտությունը ճկուն կգտնվի և մինչև օգոստոս կվերականգնի հարաբերությունները ՌԴ-ի հետ, որպեսզի խաղողը գետնին չմնա։ Սարգսյանը նշել է, որ կան խաղողագործներ, որոնք պայմանագրեր ունեն մթերող ընկերությունների հետ, ինչը նրանց համար կնվազեցնի ֆորսմաժորային իրավիճակների հավանականությունը։
