Թաիլանդի մայրաքաղաք Բանգկոկի փաբերից մեկում բռնկված հրդեհի հետևանքով զոհվել է 27 մարդ, տասնյակ մարդիկ վիրավորվել են, երկուշաբթի օրը հայտնել են պաշտոնյաները։ Ոստիկանությունը հետաքննում է հնարավոր անփութությունը, այդ թվում՝ արտակարգ ելքերի փակ լինելը, երբ հաճախորդները փորձում էին փախչել այրվող վայրից։
Սոցիալական ցանցերում հրապարակված և Reuters-ի կողմից ստուգված տեսանյութում երևում է, թե ինչպես է «Rong Beer Na Lat Phrao» փաբից թանձր ծուխ դուրս գալիս, որից հետո դռան միջից հրե բուռն հոսք է դուրս ժայթքում, իսկ հաճախորդները ճչալով փախչում են։
«Զոհերի մեծ մասը վազել է դեպի շենքի հետնամաս՝ դեպի զուգարան, և հրդեհային ելքի որևէ հստակ նշան չի եղել», – ասել է վարչապետ Անուտին Չարնվիրակուլը, որն այցելել է դեպքի վայր։
Քաղաքի բժշկական վարչությունից հայտնել են, որ կիրակի օրը կեսգիշերին մոտ տեղի ունեցած միջադեպի հետևանքով վիրավորվել է 73 մարդ, որոնցից 25-ի վիճակը ծանր է։ 32 մարդ բուժօգնություն ստանալուց հետո վերադարձել է տուն։
Բանգկոկի աղետների կառավարման վարչությունը հայտնել է, որ նախնական գնահատմամբ՝ հրդեհը կարող էր առաջանալ առաստաղի օդորակիչում տեղի ունեցած կարճ միացումից։ Ոստիկանությունը հայտնել է, որ հետաքննում է այն վարկածը, որ որոշ ելքեր արգելափակված են եղել, դռները՝ կողպված, իսկ ձայնամեկուսացման և բեմի դեկորացիաների համար օգտագործվել են դյուրավառ նյութեր։ Բիզնեսի սեփականատերը գտնվում է ինտենսիվ թերապիայի բաժանմունքում, և ոստիկանությունը փորձում է հարցաքննել աշխատակիցներին։
«Այս պահին ոստիկանությունը անփութությունը հիմնական վարկած է համարում իր հետաքննության համար», – լրագրողներին ասել է ազգային ոստիկանության պետ Կիտիրատ Ֆանֆետը։
«ԾՈՒԽԸ ԱՄԵՆ ՏԵՂ ԷՐ»
Հրշեջ Չակրիտ Խոնգկոմը պատմել է, որ ժամանել է առաջին հրշեջ մեքենայով և տեսել, որ փաբը բռնկված է, իսկ շատ հաճախորդներ ներսում են մնացել. ոմանք փորձում էին փախչել շենքի հետնամասից։ Առջևի մասով դուրս եկող քչերը այրվածքներ են ստացել։
«Ծուխը ամեն տեղ էր, Փրկվածների մեծ մասը խեղդվում էր ծխից», – ասել է նա։ Արտակարգ ծառայության աշխատակցի մարմնի տեսախցիկի կադրերը, որոնք տեսել է Reuters-ը, ցույց են տալիս հրշեջների՝ թթվածնային դիմակներով, որոնք լապտերներով շարժվում են փաբի մթնեցած ավերակների միջով՝ փրկվածներին և զոհերին փնտրելիս։ Մի քանի զոհեր ընկած էին հատակին՝ փաբի զուգարանների մոտ, մինչ փրկարարները նրանց պատգարակներով դուրս էին բանում։
«Մենք փրկարարական խումբ ուղարկեցինք և պարզեցինք, որ շատ մարդիկ են եղել զուգարանի ներսում։ Նրանց մեծ մասը փորձում էր փախչել դեպի հետնամաս, քանի որ տեսել էին, որ կրակը առջևի մասում է», – ասել է Չակրիտը։ Առավոտյան ժամերին դիակները՝ համարակալված, երկու շարքով դրված էին՝ սպասելով տեղափոխմանը, մինչ դատաբժշկական փորձագետները զննում էին տարածքը։ Հրշեջները կանգնած էին փաբի մուտքի մոտ, որի ճակատային մասը այրված և սևացած էր կրակից։ Հրդեհից հետո Սուկանյա Վոնգվոնգվայը սպասում էր փաբի դրսում՝ փնտրելով անհետ կորած ընկերոջը։ Փրկվածները նրան պատմել էին ներսում տիրող քաոսի մասին։
«Իմ ընկերը, որը երգում էր բեմում, ասաց, որ սկզբում նկատել են այրվող ինչ-որ բանի հոտ, իսկ քիչ անց տեսել են, որ առաստաղն է այրվում», – ասել է 32-ամյա Սուկանյան։
«Որոշ մարդիկ վիրավորվել էին առաստաղի բեկորներից, քանի որ կարծես առաստաղը պատրաստված էր ձայնը կլանող փրփրային նյութից»։
ՀՐԴԵՀՆԵՐԻ ՊԱՏՄՈՒԹՅՈՒՆ
Վերջին տարիներին Թաիլանդում ժամանցի վայրերում մի քանի հրդեհներ են գրանցվել, որտեղ հրդեհային անվտանգության ստուգումներ անցկացվում են, սակայն սեփականատերերը միշտ չէ, որ հետևողականորեն պահպանում են արձանագրությունները։
2022 թվականին Չոնբուրիի գիշերային ակումբում բռնկված հրդեհի հետևանքով զոհվել է առնվազն 13 մարդ, իսկ 2009 թվականին Բանգկոկի ակումբներից մեկում Ամանորյա երեկույթի ժամանակ 65 մարդ է զոհվել. հետաքննությունը պարզել է, որ հիմնական գործոններն էին կոռուպցիան և անվտանգության խախտումները։ Քաղաքային իշխանությունները հայտնել են, որ «Rong Beer Na Lat Phrao»-ն լիցենզավորված է եղել որպես ռեստորան և կենդանի երաժշտության վայր, և ստուգվել է այս տարվա ապրիլին, երբ հրդեհային ելքերը, նշանները և կրակմարիչները տեղում են եղել։
Նահանգապետի գրասենյակը հայտնել է, որ կստուգվեն փաբի առաստաղի նյութերը, դեկորացիաները և ներքին սարքավորումները, ինչպես նաև այն հավանականությունը, որ սեղաններն ու այլ իրեր կարող էին արգելափակել ելքերը։
Անուտինի գրասենյակի կողմից դեպքի վայրի ստուգման ժամանակ տարածված տեսանյութում վարչապետին ասել են, որ մի դուռ, որը ժամանակին եղել է ելք, փակված է եղել պտուտակով, քանի որ սեփականատերը վախեցել է, որ հաճախորդները կարող են դուրս գալ՝ առանց հաշիվը վճարելու։ Դռան վրա եղել է «միայն աշխատակիցների համար» մակագրությամբ նշան, և այն կարելի էր բացել դեպի դուրս, սակայն պաշտոնյան Անուտինին ասել է, որ հաճախորդները տեղյակ չէին լինի այդ մասին։ «Եթե նրանք վազեին այս ուղղությամբ, ամեն ինչ լավ կլիներ», – պատասխանել է Անուտինը։
Փրկվածների պատմությունների հիման վրա պաշտոնյաները հայտնել են, որ հրդեհը կարող էր սկսվել առջևի բեմի հատվածից և արագ տարածվել՝ ստիպելով շատերին վազել դեպի հետնամասի խոհանոց և զուգարաններ։
Ոստիկանության տվյալներով՝ հայտնաբերված մարմինների մեծ մասը զուգարանների մոտ է եղել։ «Կա երկու հրդեհային ելք, մեկը՝ խոհանոցի մոտ։ Ճանապարհին գարեջրի արկղեր էին դրված», – ասել է Բանգկոկի նահանգապետ Չադչարտ Սիտիպունտը։
