ԱԺ պաշտպանության և անվտանգության հարցերի մշտական հանձնաժողովի արտահերթ նիստում ՔՊ խմբակցության պատգամավոր Սասուն Միքայելյանը հայտարարեց, որ դեմ է ընդդիմադիրների նախաձեռնությանը, որով առաջարկվում էր հանձնաժողով հրավիրել պատկան մարմիններին և Շաքի բնակավայր ադրբեջանցի զինծառայողի ներթափանցման հարցով պարզաբանումներ պահանջել։
«Մենք եկել ենք գործին օգուտ տա՞նք, թե՞ քաղաքականացնենք։ Տղերքն ասում են, որ Մեղրիի դեպքերը, երբ եղան, ի՞նչ հետևություններ եղան, մեր հանձնաժողովը հետևողական եղա՞վ, պարզաբանեցի՞ն։ Ես այս նախաձեռնությանը դեմ եմ, դեմ եմ, որ պատկան մարմիններին կանչենք, նախաքննությունից առաջ հարցեր տանք։ Կգան, կասեն՝ դեռ նախաքննական փուլում է։ Մեր խնդիրն այն է, որ հետևողական լինենք, որ նման բաներ չկրկնվեն»,- ասաց նա։
Ավելի վաղ 4 ընդդիմադիր պատգամավորներ պահանջում էին, որպեսզի հանձնաժողովը հրավիրի ՊՆ նախարարին, ՆԳ նախարարին և ԱԱԾ տնօրենին ու պահանջի պարզաբանում այն մասին, թե «Պաշտպանության մասին», «Պետական սահմանի մասին», «ԱԱԾ-ի մասին» և հարակից օրենքների ու դրանց հիման վրա ընդունված իրավական ակտերով ո՞ր կարգավորումներն են խախտվել, որոնք հանգեցրել են Շաքիում ադրբեջանցի զինծառայողի հայտնվելուն, և ինչով է պայմանավորված վերջինիս՝ ժամանակին չհայտնաբերվելը։
Անդրադառնալով այն մտահոգություններին, որ միջադեպից հետո Շաքիում մարդիկ ահաբեկված են՝ Միքայելյանն ասաց. «Ինչ վերաբերում է, որ ասում են՝ ահուսարսափ է․․․ Մի հատ խփնված ադրբեջանցի է մտել մեր գյուղ, մենք էս բարձր ամբիոնից շոու ենք սարքում։ Կմտածեն՝ էս կտցրուկը գնացել, սաղ Հայաստանը վախից թպրտում է»։
Այս քննարկումը ցույց է տալիս, որ Շաքիի միջադեպի շուրջ տարաձայնությունները դուրս են եկել զուտ իրավական հարթությունից։ Ընդդիմությունը փորձում է պատասխանատվության մեխանիզմներ գործի դնել, իշխանական կողմը զգուշանում է, որ նախաքննության ընթացքում հրապարակային հարցերը կարող են խանգարել գործի բնականոն ընթացքին։ Երկու մոտեցումներն էլ ունեն իրենց տրամաբանությունը, սակայն գլխավոր հարցը մնում է անպատասխան՝ ինչպե՞ս է, որ սահմանապահ գոտում ադրբեջանցի զինծառայողը կարողացել է անարգել ներթափանցել և ժամանակին չհայտնաբերվել։ Մինչև այս հարցի պատասխանը չստացվի, Շաքիի բնակիչների մտահոգությունները հանգիստ չեն թողնի՝ անկախ նրանից, թե որքան «շոու» կհամարվի դա բարձր ամբիոնից։
