ԱՄՆ նախագահ Դոնալդ Թրամփը հայտարարել է, որ Իրանի հետ հրադադարի ռեժիմը փաստացի այլևս չի գործում։ Այս մասին նա հայտարարել է Անկարայում ՆԱՏՕ-ի գագաթնաժողովի ժամանակ՝ պատասխանելով լրագրողների հարցերին։
«Ես կարծում եմ, որ դա ավարտվել է։ Ես այլևս չեմ ուզում նրանց հետ գործ ունենալ»,- հայտարարել է Թրամփը։ Նա հավելել է, որ դեռ կզրուցի ամերիկացի բանագնացների հետ, բայց, իր կարծիքով, հետագա բանակցությունները «ժամանակի անիմաստ կորուստ են»։
Թրամփը նաև նշել է, որ ամերիկացի զինվորականները հուլիսի 8-ի գիշերը «շատ հզոր հարվածներ» են հասցրել Իրանի ուղղությամբ։ «Նրանք հիվանդ են։ Նրանց հետ ինչ-որ բան այն չէ։ Մենք նրանց ասացինք. «Գնացեք ու զբաղվեք ձեր թաղման գործերով», իսկ դրա փոխարեն նրանք երեկ սկսեցին կրակել նավերի ուղղությամբ։ Այնպես որ անցած գիշեր մենք նրանց ուղղությամբ շատ ուժեղ հարված հասցրինք»,- հավելել է ԱՄՆ նախագահը։
ԱՄՆ Կենտրոնական հրամանատարությունը (CENTCOM) հուլիսի 8-ի գիշերը հայտարարել էր Իրանի ՀՕՊ համակարգերի, ռադիոտեղորոշման կայանների, հականավային հրթիռային համալիրների ու ռազմանավակների ուղղությամբ հարվածների մասին՝ նշելով, որ թիրախները եղել են Իրանի տարածքում։
Ի պատասխան՝ Իսլամական հեղափոխության պահապանների կորպուսը հայտարարել էր, որ իրանական զորքերը անօդաչուներով և հրթիռներով հարձակվել են Պարսից ծոցում գտնվող 85 թիրախի ուղղությամբ, որոնք կապված են ամերիկյան կողմի հետ։
Ծովային առևտրի բրիտանական գործակալության տվյալներով՝ վերջին երեք օրվա ընթացքում առևտրային տանկերները նշել են, որ հարձակման են ենթարկվել Հորմուզի նեղուցում։ Թեհրանը չէր մեկնաբանել տեղի ունեցածը, սակայն ԱՄՆ իշխանությունները կարծում են, որ հարվածները եղել են Իրանի կողմից։
Ի պատասխան այս գործողությունների, ԱՄՆ ֆինանսների նախարարությունը հետ է կանչել լիցենզիան, որը թույլ էր տալիս իրանական նավթի վաճառքը։
Հունիսի կեսերին Միացյալ Նահանգները և Իրանը ստորագրել էին փոխըմբռնման հուշագիր, որը նախատեսում էր 60-օրյա հրադադար և վերջնական խաղաղության համաձայնագրի շուրջ երկկողմ բանակցություններ։
