News.am — Ուկրաինայի զինված ուժերը հուլիսի 22-ի գիշերը հարվածներ են հասցրել Բրյանսկի մարզի Կլիմովսկի շրջանում տեղակայված «Միրատորգ» ագրոհոլդինգի օբյեկտներին։
Հրետակոծության հետևանքով ձեռնարկություններից մեկում վնասվել են արտադրական կորպուսները և բռնկվել հրդեհ, ինչի մասին հայտնել է ընկերության մամուլի ծառայությունը՝ նշելով, որ զգալի վնաս է հասցվել, բայց տուժածներ չկան։ Մեկ այլ օբյեկտի վրա հարձակման ժամանակ անօդաչու թռչող սարքի բեկորներից վիրավորվել է անվտանգության աշխատակից, իսկ խոզաբուծական համալիրի տարածքում բեռնաթափման պահին գտնվող բեռնատարը դուրս է եկել շահագործումից, թեև վարորդը չի տուժել։
Սա երկրորդ հարձակումն է նույն ընկերության վրա, քանի որ նախօրեին՝ հուլիսի 21-ին, Բրյանսկի մարզում գտնվող «Միրատորգի» այլ ձեռնարկություններ նույնպես հարձակման էին ենթարկվել, ինչի հետևանքով վնասվել էին մի քանի արտադրական կորպուսներ և ոչնչացվել երկու ծանրաքաշ բեռնատար։ Ռուսաստանում խոզի և տավարի մսի խոշորագույն արտադրող հանդիսացող ընկերությունը, որի սեփականատերեր եղբայրներ Լիննիկները կապված են Դմիտրի Մեդվեդևի կնոջ հետ, օրական արտադրում է 30 տոննա մթերք և մատակարարում ամբողջ երկրով մեկ։
Այս գործողությունները տեղի են ունենում Wildberries առցանց հարթակի լոգիստիկ կենտրոնների դեմ իրականացված հարձակումներից անմիջապես հետո, երբ հուլիսի 18-ին և 22-ին Տամբովի, Մոսկվայի, Կրասնոդարի և Նևիննոմիսկի պահեստներին հասցված հարվածների հետևանքով կային զոհեր և տասնյակ վիրավորներ, իսկ հրդեհների պատճառով բնակիչներին խորհուրդ էր տրվել կրել շնչադիմակներ։ Ուկրաինայի նախագահ Վլադիմիր Զելենսկին հաստատել է, որ հարվածները ռուսական առևտրային հարթակի օբյեկտներին հանդիսանում են «հեռահար պատժամիջոցներ», քանի որ դրանք ներգրավված են եղել բանակին ԱԹՍ-ների և հանդերձանքով ապահովելու գործում։
Հիշեցնենք, որ հունիսի 25-ին Զելենսկին հաստատել էր Ռուսաստանի վրա «40-օրյա ազդեցության գործողությունը»՝ պատերազմի դադարեցմանը հասնելու նպատակով, թեև չէր հստակեցրել դրա կոնկրետ բովանդակությունը։
