Aravot — Համացանցում տարածված տեսանյութը, որտեղ մի խումբ տղամարդիկ դաժանաբար ծեծում են ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի եղբորը՝ Ավետ Կոնջորյանին, իրավապահների ուշադրության կենտրոնում է հայտնվել։ Քննչական կոմիտեն արդեն նախաձեռնել է քրեական վարույթ, որի շրջանակներում ձերբակալվել է երկու անձ, այդ թվում՝ Աբովյանի ավագանու ՔՊ խմբակցության անդամ Նաիրի Հակոբյանը։
Դեպքի նախապատմությունը տանում է դեպի «Միլոն մայնինգ» ընկերություն, որտեղ աշխատել է Ավետ Կոնջորյանը։ Ընկերության սեփականատեր Բաբկեն Հովակիմյանը պատմում է, որ Կոնջորյանին աշխատանքի էր ընդունել հենց Նաիրի Հակոբյանի խորհրդով՝ նրան նշանակելով «Միլոն Ռիելթի» ընկերության տնօրեն։ Սակայն ժամանակի ընթացքում պարզվել է, որ Կոնջորյանը զբաղվել է գումարների յուրացմամբ՝ բնակարանների վաճառքի ժամանակ գնորդներից ավել գումարներ վերցնելով և կանխիկ գումարները ընկերության հաշվեհամարին չփոխանցելով։ Ըստ ընկերության իրավաբան Լավրենտ Հարությունյանի՝ պատճառված վնասը գերազանցում է 100 հազար ԱՄՆ դոլարը, իսկ խարդախությունները բացահայտվել են հենց Նաիրի Հակոբյանի կողմից։
Բաբկեն Հովակիմյանը նշում է, որ միջադեպի մասին փորձել է տեղեկացնել Հայկ Կոնջորյանին, սակայն պատգամավորը հրաժարվել է խառնվել եղբոր գործերին։ 2025 թվականին Ավետ Կոնջորյանին աշխատանքից հեռացրել են, սակայն լարվածությունը չի մարել։ Նաիրի Հակոբյանի հայրը՝ Սամվել Հակոբյանը, պնդում է, որ հեռացումից հետո Ավետ Կոնջորյանը պարբերաբար գիշերային ժամերի այցելել է իրենց տան բակ, հայհոյել և սադրել որդուն՝ ստեղծելով պայթյունավտանգ իրավիճակ։
Ներկայումս Նաիրի Հակոբյանը գտնվում է ձերբակալման մեջ, իսկ նրա պաշտպան Աբգար Պողոսյանը հայտնում է, որ իր պաշտպանյալին մեղադրանք դեռ չի առաջադրվել։
