Հայաստանի քննչական կոմիտեն ավարտել է կրթության և գիտության նախկին նախարար Արմեն Աշոտյանի և ևս երկու անձի մասով հարուցված քրեական վարույթի նախաքննությունը։ Մեղադրական եզրակացությամբ գործն արդեն ուղարկվել է հսկող դատախազին՝ դատարան ուղարկելու միջնորդությամբ։
Ըստ պաշտոնական տվյալների՝ գործը վերաբերում է 2009-2016 թվականներին Բրյուսովի անվան պետական լեզվահասարակագիտական համալսարանի գույքի ապօրինի օտարմանն ու դրա հետ կապված փողերի լվացման դեպքերին։ Խոսքը Երևանի Պուշկինի փողոցի 38/1 շենքում գտնվող ավելի քան 451 քմ մակերեսով հասարակական շինության մասին է, որի շուկայական արժեքը գնահատվել է 208 մլն 908 հազար դրամ։
Քննության տվյալներով՝ պաշտոնատար անձինք չարաշահել են իրենց լիազորությունները և նախնական համաձայնությամբ նպաստել առանձնապես խոշոր չափերով փողերի լվացմանը։ Բացի Աշոտյանից, այս դրվագներով մեղադրանք է առաջադրվել նաև նախկին պաշտոնյաների և համալսարանի ղեկավար կազմի ներկայացուցիչների։ Մյուս անձանց մասով նախաքննությունը դեռ շարունակվում է։
Այս գործը ոչ միայն առանձին պաշտոնյաների պատասխանատվության հարցն է, այլև ցույց է տալիս, թե ինչպես են պետական բուհերի ակտիվները տարիներ շարունակ ծառայել նեղ անձնական կամ խմբային շահերին։ Խնդիրը պետական կառավարման համակարգում վերահսկողական մեխանիզմների բացակայությունն է, որը թույլ է տվել նման մասշտաբի չարաշահումներ։
Հետաքրքրական է, թե դատական գործընթացի ընթացքում ինչ նոր մանրամասներ կի հայտնվեն այս գույքի իրական շահառուների և փողերի հետագա շարժի վերաբերյալ։ Դա թույլ կտա հասկանալ, թե համակարգային կոռուպցիան ինչպես էր ներթափանցում կրթական հաստատություններ։
