ԱՄՆ զինված ուժերը վերջին շաբաթների ընթացքում գաղտնի կերպով նավարկության անվտանգ միջանցք են կազմակերպել Հորմուզի նեղուցով, որով օրական արտահանվում է շուրջ 10 միլիոն բարել նավթ։ Ամեն գիշեր 15-20 տանկեր է անցնում նեղուցի հարավային ջրանցքով՝ Օմանի ափամերձ գոտու երկայնքով, ինչը նկատելիորեն մեղմում է արտահանման խափանումների հետևանքները և կայունացնում համաշխարհային շուկան։
Գործողությունն իրականացնող ամերիկացի զինվորականներն ապահովում են նաև դատարկ նավերի անցումը Արաբական ծովից դեպի Պարսից ծոց, որտեղ դրանք բեռնվում են նավթով ու վերադառնում։ Օպերացիան համակարգվում է հատուկ շտաբի կողմից, իսկ ռազմական ինքնաթիռները պաշտպանում են քարավանները իրանական հնարավոր հարձակումներից։
Այս ամենը հնարավոր է դարձել Կենտրոնական հրամանատարության արշավից հետո, որի ընթացքում վնասվել են Իրանի ռադիոլոկացիոն համակարգերն ու ծովային դիտարկման միջոցները։ Թեհրանը շարունակում է փորձել հարվածներ հասցնել անօդաչուների և թևավոր հրթիռների կիրառմամբ, սակայն ԱՄՆ-ի ուժերը հաջողությամբ հետ են մղում այդ գրոհները։
ԱՄՆ նախագահ Դոնալդ Թրամփը հաստատել է, որ նեղուցով այժմ հսկայական քանակությամբ նավթ է անցնում, միաժամանակ հավելելով, որ Վաշինգտոնն այս պահին բանակցություններ չի վարում իրանական կողմի հետ։
Հորմուզի նեղուցով անվտանգ միջանցքի ստեղծումը ցույց է տալիս, թե որքան մեծ կախվածություն ունի համաշխարհային տնտեսությունը էներգակիրների անխափան մատակարարումներից։ ԱՄՆ-ի այս քայլը ոչ միայն մեղմում է նավթային շուկայի լարվածությունը, այլև էապես փոխում է ուժերի հարաբերակցությունը տարածաշրջանում։
Մինչ զինվորականներն ապահովում են տանկերների անցումը, իրավիճակը շարունակում է մնալ խիստ լարված։ Հետագա շաբաթներին հիմնական հարցն այն է, թե որքան ժամանակ կհաջողվի պահպանել այս երթուղու անվտանգությունը։
