Հունաստանի խորհրդարանը ձայների մեծամասնությամբ ընդունել է օրենք, որն արգելում է մինչև 15 տարեկան երեխաներին օգտվել սոցիալական ցանցերից։ Օրենքն ուժի մեջ կմտնի 2027 թվականի հունվարի 1-ից, և դրան աջակցել են միայն իշխող «Նոր ժողովրդավարություն» կուսակցության պատգամավորները, մինչդեռ գլխավոր ընդդիմադիր կուսակցությունը՝ ՊԱՍՈԿ-ը, ձեռնպահ է մնացել, իսկ մնացածը դեմ են քվեարկել։
Թվային քաղաքականության նախարար Դիմիտրիս Պապաստերգիուն նոր կարգավորումներն անվանել է «անհրաժեշտ, արդյունավետ, համաչափ և համատեղելի ԵՄ օրենսդրության հետ»։ Նա ասել է, որ կառավարությունը պետք է պայքարի ինտերնետի անվերահսկելի օգտագործման դեմ, որը երեխաների շրջանում կախվածություն է առաջացնում և վնասում է նրանց հոգեկան առողջությանը։
2027 թվականի հունվարի 1-ից Facebook-ի, Instagram-ի և TikTok-ի նման թվային հարթակները պարտավոր կլինեն ստուգել, թե արդյոք իրենց հաշիվներն ու ծառայություններն ուղղված են մեծահասակներին։ Արգելքը վերաբերում է կոնկրետ սոցիալական ցանցերին, այլ ոչ թե երեխաների՝ համացանցից օգտվելու ընդհանուր հնարավորությանը կամ բջջային հեռախոսներ ունենալուն։
Հունաստանի կառավարության խոսնակ Պավլոս Մարինակիսը նշել է, որ օրենքը չի սահմանում տարիքի ստուգման հատուկ մեթոդ. լուծումները պետք է լինեն արդյունավետ, հուսալի և գաղտնի։
Ասվածի մեջ ամենաուշագրավը թերևս այն է, որ օրենքն ընդունվել է առանց տարիքի ստուգման հստակ մեխանիզմի։ Պատգամավորները հաստատել են արգելքը, որը պետք է գործի 2027 թվականի հունվարից, սակայն կառավարությունն ինքն է ընդունում, որ լուծումը դեռ գոյություն չունի։ Այսինքն՝ հարթակներին մնում է մեկուկես տարուց քիչ ժամանակ՝ իրենք գտնեն պատասխանը հարցին, թե ինչպես ապացուցել օգտատիրոջ տարիքը՝ չխախտելով գաղտնիությունը։
Քվեարկության արդյունքն էլ իր մասին է. օրենքին կողմ է քվեարկել միայն իշխող կուսակցությունը, ընդդիմությունը ձեռնպահ է մնացել կամ դեմ քվեարկել։ Սա նշանակում է, որ կարգավորման շուրջ քաղաքական համաձայնություն չկա, և եթե կիրառման փուլում խնդիրներ առաջանան, պատասխանատվությունը լիովին ընկնելու է գործադիրի ուսերին։
Առանձին հարց է՝ արդյոք արգելքը կաշխատի։ Տարիքի ստուգումը տեխնիկապես բարդ է և հաճախ հանգեցնում է անձնական տվյալների հավաքման, ինչն էլ իր հերթին նոր ռիսկեր է ստեղծում։ Թե ինչպես Հունաստանը կլուծի այս հավասարումը, առաջիկա ամիսների ամենահետաքրքիր հարցերից մեկն է։
