Իսրայելի ԱԳ նախարար Գիդեոն Սաարը կիրակի օրը կառավարությանը կառաջարկի բանաձև՝ պաշտոնապես ճանաչելու Օսմանյան կայսրության վերջին տարիներին հայերի դեմ իրականացված ցեղասպանությունը: Այս քայլը, ըստ The Times of Israel-ի, կբորբոքի դիվանագիտական մրցակից Թուրքիային։
Իսրայելը երկար ժամանակ խուսափում էր ցեղասպանությունը ճանաչելուց՝ հաշվի առնելով հարցի դիվանագիտական զգայունությունը։ Սակայն նախագահ Ռեջեփ Թայիփ Էրդողանի օրոք Թուրքիայի հետ հարաբերությունների կտրուկ վատթարացումը, որը բազմիցս մեղադրել է Իսրայելին Գազայում ցեղասպանության մեջ, հանգեցրել է ճանաչմանն ուղղված որոշակի քայլերի։ Անցյալ օգոստոսին Իսրայելի վարչապետ Բենիամին Նեթանյահուն առաջին անգամ հայտարարել էր, որ ճանաչում է ցեղասպանությունը։
Առաջարկվող բանաձևում նշվում է, որ չնայած լայնածավալ և անվիճելի պատմական փաստաթղթավորմանը՝ Հայոց ցեղասպանությունը շարունակում է մնալ ժխտման և նվազեցման կազմակերպված արշավի առարկա՝ հիմնականում Թուրքիայի կողմից։ Այս բարոյական և պատմական պարտավորության լույսի ներքո առաջարկվում է, որ Իսրայելի կառավարությունը ճանաչի հայ ժողովրդի դեմ կատարված ցեղասպանությունը։
Բացի այդ, հաշվի առնելով Հայոց ցեղասպանության վայրագությունները մշուշոտելու, նվազագույնի հասցնելու կամ ժխտելու շարունակական փորձերը, առաջարկը կոչ է անում դատապարտել այդ իրադարձությունների պատմական ճշմարտությունը խեղաթյուրելու բոլոր ջանքերը։
Իսրայելի ԱԳ նախարարը X-ի իր միկրոբլոգում առանձին գրառում է արել այս առաջարկի մասին։ «Օսմանյան կայսրության վերջին տարիներին հայ ժողովրդի դեմ իրականացված ցեղասպանության ճանաչումը և՛ բարոյական, և՛ պատմական պարտականություն է։ Մենք պետք է նաև վճռականորեն դատապարտենք պատմական ճշմարտության ցանկացած ժխտում, նվազեցում կամ աղավաղում։ Բանաձևը հետագայում կներկայացվի Քնեսեթ՝ քվեարկության»,- հայտարարել է Սաարը։
