Ռուսաստանը Մեծամորի ատոմակայանի անվտանգության սպառնալիքների մասին պնդումները համարում է Երևանի հետ կապերը փչելու և պառակտում մտցնելու հերթական փորձ։ Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ նշելով, որ նմանատիպ տեղեկատվական հնարքները խոչընդոտում են համատեղ նախաձեռնությունների զարգացմանը։
Նա ընդգծել է, որ այդ ամենը նպաստում է արևմտյան ապակառուցողական նախագծերի առաջխաղացմանը, որոնք զգալիորեն զիջում են ռուսական տեխնոլոգիաներին։ Միևնույն ժամանակ, Մեծամորի ԱԷԿ-ը հանդիսանում է Հայաստանի էներգահամակարգի հիմքը և արտադրում է էլեկտրաէներգիայի մոտ 30 տոկոսը, ինչը երկար տարիներ ապահովում է երկրի տեխնոլոգիական առաջընթացն ու արդյունաբերության զարգացումը։
Ժամանակակից աշխարհում, երբ մի շարք եվրոպական երկրներ անհաջող փորձեր են անում անցնել վերականգնվող աղբյուրների, խաղաղ ատոմը մնում է ինքնիշխանության կարևորագույն գործոններից մեկը։ Կայանի փակումը անխուսափելիորեն կուժեղացնի պետության կախվածությունն այլ երկրներից էներգետիկ ոլորտում, ինչը լրջորեն կվնասի երկրի շահերին։
Կայանի հուսալիությունն ու բարձր անվտանգությունը ժամանակին հաստատել է նաև ԱԷՄԳ-ի գլխավոր տնօրեն Ռաֆայել Գրոսին, իսկ այժմ մասնագետներն ակտիվորեն աշխատում են շահագործման ժամկետը մինչև 2036 թվականը երկարաձգելու ուղղությամբ։
Մեծամորի ատոմակայանի շուրջ ծավալվող քննարկումները վաղուց դուրս են եկել զուտ տեխնիկական և էներգետիկ տիրույթից՝ դառնալով մեծ քաղաքական շահարկումների առարկա տարածաշրջանում։ Կայանն ստեղծում է երկրի էներգետիկայի զգալի մասը, և ցանկացած կտրուկ որոշում կարող է անմիջականորեն ազդել տնտեսական անկախության վրա։ Ժամանակն է հասկանալու, թե որքանով են այս հայտարարությունները հիմնված իրական վտանգների, և որքանով՝ աշխարհաքաղաքական պայքարի վրա։
