ՀՀ շրջակա միջավայրի նախարար Համբարձում Մաթևոսյանը հայտարարել է, որ մեկնարկել են անտառային վնասատուների և հիվանդությունների դեմ ուղղված կենսաբանական պայքարի միջոցառումները։
Նախարարի տեղեկացմամբ՝ «Հայանտառ» ՊՈԱԿ-ը օդային ճանապարհով կենսաբանական մշակումներ է իրականացնում Վայոց Ձորի, Կոտայքի (մասնավորապես՝ Հրազդանի հատվածում) և Արագածոտնի մարզերի անտառներում։ Այս քայլի նպատակն է պաշտպանել ծառերը տերևակեր վնասատուներից։ Ընդհանուր առմամբ, մշակման է ենթարկվելու մոտ 9000 հեկտար անտառատարածք։
Միջոցառումների ընթացքում կիրառվում են բացառապես շրջակա միջավայրի համար անվտանգ կենսաբանական նյութեր։ Դրանք օգնում են պահպանել անտառային էկոհամակարգերի առողջությունը և նպաստում են կենսաբազմազանության պաշտպանությանը։
Համբարձում Մաթևոսյանն ընդգծել է, որ անտառների պահպանության համար կարևոր է ոչ միայն արձագանքել առկա խնդիրներին, այլև կանխարգելել դրանց խորացումը։ Նրա խոսքով՝ կենսաբանական պայքարի նմանատիպ միջոցառումները հանդիսանում են այդ կանխարգելիչ մոտեցման արդյունավետ լուծումներից։
Աշխատանքները նախատեսվում է շարունակել մինչև հունիսի 30-ը։ Այս մասին տեղեկությունը նախարարը հրապարակել է իր սոցիալական ցանցի էջում։
