«Ռոսսելխոզնադզոր»-ի ղեկավարը հայտարարել է, թե ՀՀ-ից ներմուծման սահմանափակումները պայմանավորված են ոչ թե քաղաքականությամբ, այլ հայտնաբերված խախտումներով

2 Min Read

Ռուսաստանի «Ռոսսելխոզնադզոր» ծառայության ղեկավար Սերգեյ Դանկվերտը «Ռոսիյսկայա գազետա»-ին տված հարցազրույցում, որը փոխանցում է ՏԱՍՍ-ը, հայտարարել է, որ Հայաստանից սննդամթերքի ներմուծման սահմանափակումները պայմանավորված են հայտնաբերված խախտումներով, այլ ոչ թե քաղաքականությամբ։ Նա ընդգծել է, որ իրենց որոշումները հիմնված են ձեռնարկությունների հետ տարիների աշխատանքի, մատակարարումների և լաբորատոր հետազոտությունների արդյունքների վրա։

Դանկվերտի կարծիքով՝ Հայաստանի հիմնախնդիրն արտադրության կազմակերպման և դրա նկատմամբ վերահսկողության բացակայությունն է։ Նա նշել է, որ երկրում կան բազմաթիվ մանր ֆերմերային տնտեսություններ, որոնք աճեցնում և արտահանում են իրենց արտադրանքը։ Սակայն, ըստ նրա, բացակայում է ներքին վերահսկողությունն ու համագործակցությունը արտադրության և փոխադրման շղթայում։ Օրինակ՝ հազարավոր փունջ կանաչի մեկ մեքենայում տեղափոխելիս կարգավորող մարմինների համար անհնար է արդյունավետ ստուգել այդքան մեծ ծավալները։

Գերատեսչության ղեկավարը շեշտել է, որ արտադրանքի որակի հսկողությունը պետք է իրականացվի անմիջապես արտադրության փուլում։ Նա հավելել է, որ արդյունավետ համակարգի համար անհրաժեշտ է արտադրողների միությունների համագործակցությունը, խիստ վերահսկողություն և պատասխանատվություն։ Այսպիսով, սահմանափակումների իրական պատճառները կապված են արտադրանքի որակի և անվտանգության հետ, և ոչ թե քաղաքական նկատառումների։

Հիշեցնենք, որ մայիսի վերջից Ռուսաստանը սահմանափակումներ է սահմանել Հայաստանից մի շարք ապրանքների, այդ թվում՝ ծաղիկների, լոլիկի, վարունգի, պղպեղի, կանաչի, ելակի, կորիզավոր մրգերի, խաղողի, սմբուկի, կարտոֆիլի և չորացրած մրգերի ներմուծման վրա։ Հունիսի 2-ից Հայաստանը պարտավորվել է դադարեցնել Ռուսաստան արտահանվող կենդանի ձկան հավաստագրումը։ Այդ ընթացքում Հայաստանը նաև քայլեր է ձեռնարկում արտահանման ուղղությունները դիվերսիֆիկացնելու համար։

Share This Article