ՀՀ Ազգային անվտանգության ծառայությունը (ԱԱԾ) 18 օր ուշացումով պատասխանել է NEWS.am-ի հարցմանը՝ Ռոբերտ Քոչարյանին վերագրվող կադրերի արտահոսքի օրինականության մասին։ Հունիսի 14-ին համացանցում տարածվել էր տեսանյութ, որում երևում էր, թե ինչպես են «Զվարթնոց» օդանավակայանի սահմանային անցակետում ստուգվում Ռոբերտ Քոչարյանի փաստաթղթերը ԱԱԾ սահմանապահ զորքերի կողմից։ Տեսանյութում հստակ երևում էին տեսախցիկների տեսագրությունը և անձնական տվյալների ստուգման գործընթացը։
Հաշվի առնելով, որ հսկողությունն իրականացնում են ԱԱԾ սահմանապահ զորքերը, NEWS.am-ը դիմել էր ԱԱԾ-ին՝ պարզելու, թե արդյոք հարուցվել է ծառայողական քննություն՝ տեսագրությունների արտահոսքի պատճառը պարզելու համար, և արդյոք կիրառվել են կարգապահական պատասխանատվության միջոցներ։ Խնդրվել էր նաև տեղեկացնել քաղաքացիների անձնական տվյալների անվտանգությունն ապահովելու ուղղությամբ ձեռնարկվող քայլերի մասին։
ԱԱԾ-ն պատասխանել է՝ հղում կատարելով «Ազգային անվտանգության մարմինների մասին» օրենքի 15-րդ հոդվածին, որը սահմանում է ԱԱԾ լիազորությունները։ Սակայն չեն հստակեցրել, թե հոդվածի որ կետն է համապատասխանում ԱԱԾ կողմից իրականացված գործառույթներին։ Օրենքի 7-րդ հոդվածը հստակ ամրագրում է, որ ԱԱԾ-ն առանց քաղաքացու համաձայնության իրավունք չունի հավաքել, պահել, օգտագործել կամ տարածել անձնական տվյալներ։
ԱԱԾ-ի պատասխանում նշվում է. «Միաժամանակ, ՀՀ ազգային անվտանգության ծառայությունն իրավասու է որևէ նպատակով հրապարակել իր կողմից տնօրինվող տեղեկատվությունը», առանց հստակեցնելու՝ ինչ նպատակով։ Այս պատասխանը, ըստ էության, կրկնում է ՀՀ վարչապետ Նիկոլ Փաշինյանի հունիսի 18-ի հայտարարությունը, թե «ԱԱԾ-ն ինչ կուզի կհրապարակի»։ Փաշինյանը նշել էր, որ ծառայողական քննություն չի նշանակվել, և ԱԱԾ աշխատակիցը կարող է որոշել՝ արդյոք իր տիրապետած ինֆորմացիան պետք է արտահոսի։
Այսպիսով, ԱԱԾ-ն իր պաշտոնական պատասխանով ստեղծում է վտանգավոր նախադեպ, որով այլևս չի երաշխավորվում քաղաքացիների անձնական կյանքի անձեռնմխելիության իրավունքը։ Կառույցն ինքն իրեն վերապահում է մենաշնորհ՝ սեփական հայեցողությամբ և քաղաքական նպատակահարմարությամբ տնօրինելու ու հանրայնացնելու պետական հսկողության տակ գտնվող տեսագրություններն ու անձնական տվյալները:
