Ադրբեջանի նախագահ Իլհամ Ալիևը հայտարարել է, որ իր երկիրը Ռուսական կայսրության և ԽՍՀՄ կազմում գաղութ է եղել։ Այս մասին նա խոսել է Շուշիի մեդիա ֆորումում։
Ալիևի խոսքով՝ խորհրդային տարիներին Ադրբեջանը չի ունեցել անկախություն։ Նա հանրապետության կարգավիճակը որակել է որպես իրավազուրկ։ Նա նշել է, որ ադրբեջանցիները գիտեն՝ ինչ է գաղութ լինելը։
Նախագահը հավելել է, որ ԽՍՀՄ տարիներին Ադրբեջանից հսկայական քանակությամբ նավթ են հանել։ Խորհրդային Միության փլուզումից հետո երկիրը մնացել է էլեկտրաէներգիայի պակասով։ Նա նաև նշել է, որ Ադրբեջանը մինչ օրս վերացնում է նավթարդյունահանման հասցրած բնապահպանական վնասները։
Ալիևը հիշեցրել է, որ 1991 թվականից հետո շատերը կանխատեսում էին նախկին հանրապետությունների անկումը։ Նրա պնդմամբ՝ այդ կանխատեսումները չեն իրականացել։ Ադրբեջանն անկախության տարիներին դարձել է ուժեղ պետություն։
Ուկրաինայի մասին հարցին պատասխանելիս նա կրկին ընդգծել է Ադրբեջանի աջակցությունը Ուկրաինայի տարածքային ամբողջականությանը։ Նա նշել է, որ Ուկրաինան չպետք է համաձայնի օկուպացիայի հետ։
Նշենք, որ Ալիևն այս գնահատականը առաջին անգամ չէ տալիս։ Նա նաև ասել էր, որ ԽՍՀՄ-ին միանալը խանգարել է Ադրբեջանին դառնալ ժողովրդավարական երկիր։
Հետաքրքիր է, որ խորհրդային տարիներին Ադրբեջանը երկար տարիներ ղեկավարել է նրա հայրը՝ Հեյդար Ալիևը։ Նա եղել է Կոմկուսի առաջին քարտուղարը, իսկ ավելի ուշ՝ զբաղեցրել ԽՍՀՄ բարձր պաշտոններ։
