Նեպալի Չիտվան ազգային պարկում ապրող Դհուրբե անունով վայրի փիղը 2009 թվականից ի վեր դարձել է իրական սարսափ տեղի բնակիչների համար։ Միայնակ մնացած կենդանին սկսել է հարձակվել գյուղերի վրա և մինչ օրս խլել է 25 մարդու կյանք։
Ամեն ինչ սկսվել է 2009-ին, երբ երիտասարդ փիղը, վտարվելով իր հոտից, սկսել է ագրեսիվ պահվածք դրսևորել։ 2012 թվականին իշխանությունները փորձել են կանգնեցնել նրան՝ կտրելով ժանիքները և տեղադրելով հետևող սարք, սակայն դա չի օգնել։ Տղամարդկանցից մեկը՝ Շանիչարա Բոտեն, դեռ 2012-ին կորցրել էր ծնողներին փղի հարձակման հետևանքով։ Նա տեղափոխվել էր 17 կիլոմետր հեռու՝ հույս ունենալով, որ գետերը կպաշտպանեն իրեն, բայց սխալվել էր։
14 տարի անց՝ 2026-ի սկզբին, Դհուրբեն գտել է նրանց նոր տունը։ Այս հարձակման ժամանակ Շանիչարան կորցրել է թոռանը։ Չնայած իշխանությունների բազմաթիվ փորձերին՝ տեղադրելու արբանյակային սարքեր կամ սահմանափակելու կենդանու շարժը, փիղը շարունակում է մնալ ազատության մեջ։ Փորձագետները կարծում են, որ հարձակումների պատճառը մարդկանց կողմից տարածքների գրավումն է և սննդի հասանելիությունը։ Դհուրբեն հաճախ հարձակվում է հենց բերքահավաքի շրջանում, քանի որ գիտի՝ որտեղ կարելի է հեշտությամբ սնունդ գտնել։
Տեղացիները զայրացած են, քանի որ փղի երթուղին կանխատեսելի է, սակայն իշխանությունները չեն կարողանում կանխել ողբերգությունները։ Այժմ պարկի աշխատակիցները ցանկանում են փղին մեկուսացնել անտառի առանձին հատվածում՝ էգ փղերի միջոցով նրան գրավելով և հեռու պահելով մարդկանցից։ Իսկ Շանիչարա Բոտեն, կորցնելով հույսը, ասում է, որ իրենք այլևս փախչելու տեղ չունեն։
