ԱՄՆ նախագահ Դոնալդ Թրամփի վարչակազմը աշխատում է համաձայնագրի շուրջ, որը երկարաժամկետ հասանելիություն կապահովի Վենեսուելայի նավթային պաշարների մի մասին։
Հնարավոր գործարքը կարող է թույլ տալ ամերիկյան ընկերություններին օգտագործել վենեսուելական մի շարք նավթահանքեր, եթե արդյունահանված հումքը երաշխավորված մատակարարվի Միացյալ Նահանգներին։ Հարցը քննարկվում է երկու երկրների իշխանությունների ամենաբարձր մակարդակներում։ Քննարկվող տարբերակներից մեկով տարածքները կտրամադրվեն վարձակալությամբ, որից հետո առանձին մրցույթներով դրանք կբաշխվեն ամերիկյան ընկերությունների միջև։ Հատուկ ցանկում արդեն ներառվել է 17 հանքավայր, որոնք տեղակայված են Օրինոկոյի նավթային գոտում և Մարակայբո լճի շրջանում։
Սակայն ծրագիրը կարող է բախվել լուրջ իրավական խոչընդոտների։ Վենեսուելայի գործող օրենսդրությունը նավթային տարածքների վարձակալության նման մեխանիզմ պարզապես չի նախատեսում, իսկ երկրի Սահմանադրությամբ ոլորտի հիմնական գործունեությունը վերապահված է միայն պետությանը։
Վաշինգտոնը ձգտում է ապահովել նավթի կայուն հոսք դեպի սեփական վերամշակման գործարաններ և խրախուսել ամերիկյան ներդրումները Վենեսուելայի էներգետիկ ոլորտում։ Այս պահին այդ երկիրն արդյունահանում է օրական մոտ 1.25 միլիոն բարել նավթ։
Բացի այդ, գործարքը քննարկվում է ԱՄՆ-ում բենզինի բարձր գների պատճառով աճող քաղաքական ճնշման ֆոնին, երբ մոտենում են նոյեմբերին կայանալիք միջանկյալ ընտրությունները։ Էժան մատակարարումներն ու արդյունահանման ծավալների ավելացումը կարող են օգնել նվազեցնել վառելիքի գները։
Այս բանակցություններն ուղղակիորեն արտացոլում են Վաշինգտոնի ձգտումը՝ ցանկացած գնով կայունացնել ներքին վառելիքային շուկան նախընտրական շրջանում։ Էներգետիկ անվտանգության ապահովումն այժմ դարձել է առաջնահերթ խնդիր, որի լուծման համար ԱՄՆ-ը պատրաստ է գնալ նույնիսկ բարդ քաղաքական գործարքների։
Գլխավոր հարցն այն է, թե ինչպես են կողմերը շրջանցելու Վենեսուելայի սահմանադրական արգելքները։ Իրավական ձևակերպումների գտնումն ու հանքավայրերի վարձակալության մեխանիզմների մշակումը ցույց կտան, թե որքանով է Կարակասը պատրաստ զիջումների գնալ հանուն ամերիկյան ներդրումների։
