Հայաստանի պաշտպանության նախարար Սուրեն Պապիկյանը տեսանյութ է հրապարակել, որտեղ երևում են չեխական Aero Vodochody Aerospace ընկերության արտադրության L-39 Skyfox ռեակտիվ ինքնաթիռները։ Գերատեսչության ղեկավարի խոսքով՝ այդ թռչող սարքերն առաջիկայում կհամալրեն մեր երկրի զինտեխնիկայի շարքը։
«Այս հրաշքները շուտով կճախրեն Հայաստանի երկնքում»,- սոցցանցում գրել է պաշտպանական գերատեսչության ղեկավարը։ Լուրը մեծ ուշադրություն է գրավել։
Նախարարի գրառումից ու կադրերից պարզ է դառնում, որ հայկական կողմը գնել է այդ ռեակտիվները, թեև գործարքի ֆինանսական կամ տեխնիկական մյուս պայմանների մասին պաշտոնական այլ տվյալներ դեռ չեն հաղորդվում։
Սուրեն Պապիկյանի գլխավորած պատվիրակությունն այս օրերին պաշտոնական այցով գտնվում է Չեխիայի Հանրապետությունում։ Այցի շրջանակում էլ կայացել է ծանոթացումը ռազմական արտադրանքին։
Պաշտպանության նախարարի այս հրապարակումը ցույց է տալիս, որ Երևանը գործնական քայլերով առաջ է մղում սպառազինության աշխարհագրության դիվերսիֆիկացիան և եվրոպական ռազմարդյունաբերության հետ կապերի ընդլայնումը։ Չեխական L-39 Skyfox ինքնաթիռները ժամանակակից ուսումնամարտական համակարգեր են, որոնք կարող են էապես փոխել ռազմական օդաչուների պատրաստման մակարդակն ու օդուժի հնարավորությունները։
Միևնույն ժամանակ, առանցքային հարցեր դեռ մնում են անպատասխան։ Պաշտոնական հաղորդագրությունը չի հստակեցնում ոչ գնված ինքնաթիռների քանակը, ոչ էլ մատակարարման հստակ ժամկետներն ու պայմանագրի արժեքը։ Առաջիկայում ուշադրության կենտրոնում կլինի հենց այն, թե երբ այդ տեխնիկան փաստացի կհասնի Հայաստան և ինչպես կինտեգրվի մեր զինված ուժերի ընդհանուր համակարգին։
