ՀՀ վարչապետ Նիկոլ Փաշինյանը հայտարարել է, որ ՌԴ վարչապետ Միխայիլ Միշուստինի հետ պայմանավորվածություններ են ձեռք բերվել ռուսական շուկա հայկական արտադրանքի ներմուծման սահմանափակումների հարցի շուրջ։ Այս մասին հայտնում է ՏԱՍՍ-ը։
Փաշինյանի խոսքով՝ ռուսական կառավարության ղեկավարի հետ բանակցությունների ընթացքում մի շարք պայմանավորվածություններ են ձեռք բերվել։ ՀՀ կառավարության ղեկավարը չի բացահայտել դրանց բովանդակությունը՝ նշելով, որ արդյունքները հայտնի կդառնան դրանց գործնական իրականացումից հետո։
Փաշինյանը Միշուստինի հետ շփումն անկեղծ ու բարեկամական է անվանել։
Հուլիսի 6-ին հայկական պատվիրակությունը Եկատերինբուրգում մասնակցել է «Իննոպրոմ-2026» ցուցահանդեսին։ Այնտեղ Փաշինյանը հանդիպել է Միշուստինի հետ։ Բանակցությունների ընթացքում նա հայտարարել է, որ Հայաստանը ոչ մի դեպքում չի հրաժարվում Ռուսաստանի հետ փոխգործակցությունից՝ չնայած երկկողմ հարաբերություններում առաջացած «խնդրահարույց հարցերին»։ Ի պատասխան՝ Միշուստինը նշել է, որ Երևանի համար կարևոր է հարգել ռուս ներդրողների իրավունքները։
Մայիսի վերջից Ռուսաստանը սկսել է արգելքներ սահմանել Հայաստանից ապրանքների ներմուծման վրա։ Մայիսի վերջին «Ռոսսելխոզնադզորը» արգելել էր ծաղիկների ներմուծումը, ինչպես նաև սահմանափակել էր թարմ լոլիկի, վարունգի, կանաչեղենի և ելակի մատակարարումները։ Հունիսի 2-ից սահմանափակումների տակ էին հայտնվել բալը, խաղողը և կենդանի ձուկը՝ նախատեսված Ռուսաստան արտահանման համար։ Հունիսի 3-ին գերատեսչությունը միջոցները տարածել էր խնձորի, տանձի, սմբուկի, կարտոֆիլի և չրերի վրա։ Հունիսի 26-ին «Ռոսսելխոզնադզորը» ընդլայնել էր Հայաստանից ձկնամթերքի մատակարարումների սահմանափակումները՝ կասեցնելով հանրապետության բոլոր ձեռնարկություններից արտադրանքի հավաստագրումը մինչև նախկինում հայտնաբերված խախտումների վերացումը։
