Իրենց ազգային զարգացման նպատակներին հասնելու համար Չինաստանը և Միացյալ Նահանգները պետք է լինեն գործընկերներ, այլ ոչ թե մրցակիցներ, ինչը թույլ կտա երկու պետություններին էլ առաջ շարժվել իրենց ընտրած ռազմավարական ուղիով։ Այս մասին ասվում է Չինաստանի նախագահ Սի Ծինփինի գրավոր ուղերձում, որը հրապարակվել է Չինաստանի կենտրոնական հեռուստատեսությամբ՝ նրա ԱՄՆ կատարած պետական այցի առաջին իսկ օրը։
Չինաստանի ղեկավարն ընդգծել է, որ երկու երկրներն էլ պետք է դառնան գործընկերներ՝ չինական ազգի մեծ վերածննդին հասնելու, ինչպես նաև Ամերիկան կրկին մեծ դարձնելու համար։
Բացի այդ, Սի Ծինփինը հավելել է, որ Պեկինն ու Վաշինգտոնը պետք է շարժվեն ընդառաջ և խթանեն կայուն հարաբերություններ, որոնցում գերակշռում է համագործակցությունը, չափավորվում է մրցակցությունը, կառավարվում են տարաձայնությունները, իսկ խաղաղությունը դառնում է իրատեսական հեռանկար։
Սի Ծինփինի հայտարարությունը ցույց է տալիս, որ Պեկինը փորձում է մեղմել լարվածությունը Վաշինգտոնի հետ և հարաբերությունները տեղափոխել կանխատեսելի դաշտ, որտեղ տնտեսական ու քաղաքական մրցակցությունը չի վերածվի բացահայտ հակամարտության:
Այս մոտեցումը հատկապես կարևոր է երկու երկրների ներքին զարգացման ծրագրերի տեսանկյունից, քանի որ թե՛ Չինաստանի տնտեսական վերելքը, թե՛ ԱՄՆ-ի արդյունաբերական վերականգնումը պահանջում են արտաքին կայունություն և գլոբալ շուկաների հավասարակշռություն:
Այնուամենայնիվ, հիմնական հարցը մնում է այն, թե որքանով կողմերին հաջողվի գործնականում կառավարել խորքային տարաձայնությունները, քանի որ քաղաքական հռետորաբանությունից զատ առկա են լուրջ տարակարծություններ տեխնոլոգիական, առևտրային և աշխարհաքաղաքական ազդեցության ոլորտներում:
