Հայաստանը հետևողականորեն ընդլայնում է իր գործընկերությունը բալթյան բոլոր երկրների հետ։ Այս մասին տեղեկացնում է ՀՀ արտաքին գործերի և միջազգային առևտրի նախարարությունը։
Նախարար Արարատ Միրզոյանի՝ Ռիգա կատարած առաջին այցի առանցքում եղել են Հայաստան-Լատվիա երկկողմ հարաբերությունների զարգացման հարցերը։ Կողմերը քննարկել են նաև ՀՀ-ԵՄ գործընկերության տարբեր թեմաներ։ Հատուկ ուշադրություն է դարձվել Հայաստանի տնտեսական ու էներգետիկ դիմակայունության շարունակական ամրապնդմանն ուղղված աշխատանքներին։
Բալթյան երկրների հետ հարաբերությունների ակտիվացումը լիովին տեղավորվում է Հայաստանի արտաքին քաղաքականության դիվերսիֆիկացման ընդհանուր տրամաբանության մեջ։ Լատվիան, Էստոնիան և Լիտվան ավանդաբար Եվրոպական միության ներսում հանդես են գալիս որպես Արևելյան գործընկերության երկրների հետ մերձեցման ակտիվ կողմնակիցներ։
Արարատ Միրզոյանի այցը Ռիգա ցույց է տալիս, որ Երևանը փորձում է ԵՄ-ի հետ հարաբերությունների խորացումը նյութականացնել կոնկրետ ոլորտներում՝ շեշտը դնելով տնտեսական և էներգետիկ անվտանգության վրա։ Առաջիկայում պարզ կդառնա, թե այս քաղաքական երկխոսությունն ինչպիսի գործնական համաձայնագրերի կվերածվի։
